ભરૂચ તાલુકાના પારખેત નજીક આવેલી પીર રોશન ઝમીર હઝરત બાવા રૂસ્ટમશાહની દરગાહ ખાતે 616મા ઉર્ષ શરીફ નિમિત્તે ભવ્ય ધાર્મિક માહોલ જામ્યો છે. ઉર્ષના પાવન અવસરને લઈને દરગાહ પરિસરને આકર્ષક રોશનીથી શણગારવામાં આવ્યું છે, જેના કારણે સમગ્ર દરગાહ પરિસર ઝગમગી ઊઠ્યું છે. ઉર્ષની ઉજવણીમાં મોટી સંખ્યામાં અકીદતમંદો અને શ્રદ્ધાળુઓ ઉમટી પડતાં સમગ્ર વિસ્તારમાં ઉત્સવ જેવો માહોલ જોવા મળી રહ્યો છે.
ઉર્ષ નિમિત્તે દરગાહ પરિસરમાં વિવિધ પ્રકારના ચગડોળ, ખાણીપીણીના સ્ટોલ તેમજ નાની-મોટી દુકાનો ઊભી કરવામાં આવી છે. બાળકો માટે ચગડોળ અને મનોરંજનનાં સાધનો આકર્ષણનું કેન્દ્ર બન્યાં છે, જ્યારે ખાણીપીણીના સ્ટોલ પર પણ લોકોની અવરજવર જોવા મળી રહી છે. ધાર્મિક આસ્થા સાથે મેળા જેવો માહોલ સર્જાતાં ઉર્ષમાં આવતા લોકો માટે આકર્ષણનાં અનેક કેન્દ્રો ઊભાં થયાં છે.
ઉલ્લેખનીય છે કે ઉર્ષ નિમિત્તે અગાઉ અસરની નમાજ બાદ સંદલ શરીફ પેશ કરવામાં આવ્યું હતું. ત્યારબાદ ફાતેહા ખ્વાની, સલાતો સલામ અને વિશેષ દુઆઓ સાથે ધાર્મિક વિધિઓ સંપન્ન કરવામાં આવી હતી. ઉર્ષના મુખ્ય અવસરને લઈને રાત્રિના સમયે શમાએ મહેફિલનો ભવ્ય કાર્યક્રમ પણ આયોજિત કરવામાં આવ્યો છે. ઉર્ષ દરમિયાન મોટી સંખ્યામાં લોકોની અવરજવરને ધ્યાનમાં રાખીને કોઈ અનિચ્છનીય બનાવ ન બને અને કાયદો-વ્યવસ્થાની સ્થિતિ જળવાઈ રહે તે માટે પોલીસ તંત્ર દ્વારા ચુસ્ત બંદોબસ્ત ગોઠવવામાં આવ્યો છે. પોલીસ જવાનોની હાજરી વચ્ચે સમગ્ર ઉર્ષની ઉજવણી શાંતિપૂર્ણ રીતે સંપન્ન થાય તે માટે સુરક્ષાની ખાસ વ્યવસ્થા કરવામાં આવી છે. આમ, 616મા ઉર્ષ શરીફ નિમિત્તે ધાર્મિક આસ્થા, રોશનીની ઝાકમઝોળ અને મેળાના માહોલે પારખેત નજીકના દરગાહ પરિસરને ઉત્સવમય બનાવી દીધું છે.
Author: Naeem Diwan
Owner Of Geogujaratnews.com