વાગરા: ધુમાડાના ગોટેગોટા, આંખોમાં બળતરા અને તીવ્ર દુર્ગંધ! UC Colours સામે ફરી સવાલો, GPCBની કાર્યવાહી પર નજર..

 સાયખા GIDCમાં પ્રદૂષણનો પુનરાવર્તન! નોટિસોથી નહીં અટકે પ્રદૂષણ, હવે ક્લોઝર સહિતની કડક કાર્યવાહીની માંગ:વાગરા તાલુકાની સાયખા GIDCમાં આવેલી UC Colours & Intermediates Pvt. Ltd. કંપની ફરી એકવાર પ્રદૂષણના ગંભીર આક્ષેપોને લઈને વિવાદના કેન્દ્રમાં આવી છે. કંપનીના શેડમાંથી અચાનક ઘાટા અને શંકાસ્પદ ધુમાડાના ગોટેગોટા બહાર નીકળતા આસપાસના વિસ્તારમાં ચકચાર મચી હતી. ધુમાડા સાથે તીવ્ર દુર્ગંધ ફેલાતા સ્થાનિકોમાં ભયનો માહોલ સર્જાયો હતો. અને આસપાસના લોકોની આંખોમાં બળતરા થતી હોવાની ફરિયાદો પણ સામે આવી છે. ઘટનાને લઈને સ્થાનિકોમાં અનેક સવાલો ઉઠી રહ્યા છે. કંપનીમાં કોઈ કેમિકલ રિએક્શન થયું હતું? કોઈ ટેકનિકલ ખામી સર્જાઈ હતી? કે પછી કોઈ જોખમી કેમિકલ પ્રક્રિયા દરમિયાન બેદરકારી દાખવાઈ હતી? હાલ આ પૈકીનું ચોક્કસ કારણ સત્તાવાર રીતે સ્પષ્ટ થયું નથી અને સમગ્ર મામલો તપાસનો વિષય બન્યો છે. જોકે, ઘટનાની ગંભીરતા એટલી છે કે માત્ર ધુમાડો જોઈને મામલો ભૂલી જવાનો નહીં, પરંતુ તેની પાછળનું વાસ્તવિક કારણ શોધવું હવે જરૂરી બન્યું છે. સૌથી ગંભીર બાબત એ છે કે આ કોઈ પહેલી વારની ઘટના નથી. નોંધનીય છે કે અગાઉ 29 જુલાઈના રોજ પણ કંપનીને લઈને આવી જ પ્રકારની પરિસ્થિતિ સર્જાઈ હોવાના અહેવાલો સામે આવ્યા હતા. એક ઘટના બાદ ફરી બીજી ઘટના સામે આવે ત્યારે સ્વાભાવિક રીતે જ કંપનીની પ્રદૂષણ નિયંત્રણ વ્યવસ્થા અને સલામતીના ધોરણો સામે સવાલો ઊભા થાય છે.આ અગાઉ પણ કંપનીની બહાર રંગીન અને શંકાસ્પદ કેમિકલયુક્ત પાણીના તળાવો ભરાઈ જવાના અહેવાલો સામે આવ્યા હતા. તે સમયે પણ આ મુદ્દો ચર્ચામાં આવ્યો હતો. તેમ છતાં જો થોડા જ સમયના અંતરે ફરીથી ધુમાડા અને દુર્ગંધની ઘટના સામે આવી રહી હોય, તો સવાલ એ છે કે અગાઉની કાર્યવાહીનો વાસ્તવિક પરિણામ શું આવ્યું? શું નોટિસો આપીને જ પ્રદૂષણની સમસ્યા ઉકેલાઈ જશે? જો વારંવાર એક જ પ્રકારની ફરિયાદો અને ઘટનાઓ સામે આવતી રહે, તો માત્ર કાગળ પર નોટિસો ફટકારવાથી પર્યાવરણનું રક્ષણ થઈ શકે નહીં. પ્રદૂષણ નિયંત્રણના નિયમોનો ભંગ થયો હોય તો જવાબદારી નક્કી કરીને અસરકારક અને દાખલારૂપ કાર્યવાહી કરવી જરૂરી છે. સ્થાનિક લોકો હવે ગુજરાત પ્રદૂષણ નિયંત્રણ બોર્ડ પાસે માત્ર તપાસની નહીં, પરંતુ વૈજ્ઞાનિક અને પારદર્શક તપાસની માંગ કરી રહ્યા છે. ઘટના સ્થળેથી હવાના નમૂના, જરૂરી કેમિકલ નમૂનાઓ તથા અન્ય પર્યાવરણીય નમૂનાઓ એકત્રિત કરવામાં આવે અને તેના આધારે સત્તાવાર અહેવાલ જાહેર કરવામાં આવે તેવી માંગ ઉઠી છે. જો તપાસમાં કંપનીની બેદરકારી કે પ્રદૂષણ ફેલાવવાની જવાબદારી સાબિત થાય તો માત્ર નોટિસ આપી કાર્યવાહી પૂર્ણ કરવાને બદલે કાયદેસરની કડક કાર્યવાહી કરવામાં આવે તેવી સ્થાનિકોની માંગ છે. સ્થાનિકોનો આક્રોશ હવે એ મુદ્દે છે કે પર્યાવરણ અને લોકોના આરોગ્ય સાથે કોઈપણ પ્રકારનું જોખમ ચલાવી લેવામાં ન આવે. ઉદ્યોગો રોજગાર અને વિકાસ માટે જરૂરી છે, પરંતુ તેના નામે હવા, પાણી અને આસપાસના રહેણાંક વિસ્તારોના પર્યાવરણ સાથે ચેડાં કરવાની છૂટ કોઈને હોઈ શકે નહીં.સ્થાનિકોની માંગ છે કે GPCB દ્વારા સમગ્ર ઘટનાની તાત્કાલિક ઉચ્ચસ્તરીય તપાસ કરવામાં આવે, કંપનીની પ્રદૂષણ નિયંત્રણ વ્યવસ્થાનું નિરીક્ષણ કરવામાં આવે અને અગાઉની ફરિયાદો તથા કાર્યવાહીનો પણ રેકોર્ડ ચકાસવામાં આવે. જો નિયમોનો ભંગ સાબિત થાય તો ક્લોઝર, દંડ તથા પર્યાવરણના નિયમો હેઠળની અન્ય કડક કાયદેસરની કાર્યવાહી કરવામાં આવે. સાથે જ ભવિષ્યમાં આવી ઘટનાઓનું પુનરાવર્તન ન થાય તે માટે કંપનીમાં સતત મોનિટરિંગ, ઉત્સર્જન પર નજર, નિયમિત પર્યાવરણીય ઓડિટ અને નિયમોના કડક પાલનની વ્યવસ્થા અમલમાં મૂકવામાં આવે તેવી માંગ ઉઠી છે. હવે સવાલ માત્ર એક કંપનીનો નથી, પરંતુ સાયખા GIDCમાં ઔદ્યોગિક પ્રદૂષણ સામે તંત્ર કેટલું ગંભીર છે તેનો છે. 29 જુલાઈ બાદ ફરી આવી ઘટના સામે આવતાં હવે માત્ર નોટિસોથી કામ ચાલશે કે ખરેખર જવાબદારી નક્કી કરીને કડક કાર્યવાહી થશે? સ્થાનિકોની નજર હવે GPCB અને સંબંધિત તંત્રના આગામી પગલાં પર ટકેલી છે.

વિડીયો જોવા અહીં ક્લિક કરો..

https://www.instagram.com/reel/DcGoZbOPN86/?igsh=dzRtcnlnNTI4MGQ3

આ પણ વાંચો: ધુમાડાથી સાયખા GIDC ગૂંગળાયું! વારંવારનું પ્રદૂષણ કે તંત્રની નિષ્ક્રિયતા? UC Colours સામે ક્લોઝરની ઉઠી માંગ..

વાગરા: સાયખા GIDCની UC Colours & Intermediatesમાંથી નીકળ્યા શંકાસ્પદ ધુમાડા, લોકોમાં ભયનો માહોલ, હવે ક્લોઝરની કાર્યવાહી થશે કે નહીં?

આ પણ વાંચો: UC Colours બહાર કલરયુક્ત પાણી! સત્ય શું? રંગીન પાણીથી ચકચાર, તપાસની માંગ તેજ!

વાગરા: સાયખા GIDCમાં ફરી પ્રદૂષણની શંકા!UC Colours કંપની બહાર કલરયુક્ત પાણીના તળાવો! હવે GPCB સત્ય બહાર લાવશે?

Author: Naeem Diwan

Owner Of Geogujaratnews.com